: मोरङको केराबारीमा जंगलभित्र महिलाको रहस्यमय शव फेला परेको छ। घरबाट करिब एक किलोमिटर टाढा रहेको जंगलमा बिहीवार साँझ स्थानीय बासिन्दाले शव देखेपछि प्रहरीलाई खबर गरेका थिए।
केराबारी गाउँपालिका–२ फैबाकी ३१–३२ वर्षीया पार्वती लिम्बू मृत फेला परेकी हुन् । उनको शव अर्धनग्न अवस्थामा रहेको र कम्मरमुनिको भागमा कपडा नभएको प्रहरीले जनाएको छ ।
घटनास्थलको प्रारम्भिक निरीक्षण गर्दा मृतकको शरीरमा बाहिरबाट देखिने कुनै पनि चोटपटक नपाइएको मोरङका प्रहरी प्रमुख एसपी कवित कटवालले जानकारी दिए। उनका अनुसार घटनास्थलमा तत्काल कुनै शंकास्पद वस्तुसमेत फेला परेको छैन।
मृतक लिम्बू विवाहित महिला हुन्। स्थानीयवासीबाट प्राप्त जानकारीअनुसार उनी र उनका पतिबीच आपसी विवाद तथा झैझगडा हुँदै आएको थियो। प्रहरीले पारिवारिक विवादको पाटोलाई पनि गम्भीरतापूर्वक लिएर अनुसन्धान अगाडि बढाएको छ। तर, यही विवादकै कारण उनको मृत्यु भएको हो भन्ने निष्कर्षमा भने प्रहरी पुगिसकेको छैन।
घटनाको गम्भीरता र प्रकृतिलाई मध्यनजर गर्दै फरेन्सिक चिकित्सकसहितको विशेष अनुसन्धान टोलीलाई घटनास्थलमा परिचालन गरिएको एसपी कटवालले बताए। उनका अनुसार घटनास्थललाई सुरक्षित राखेर अनुसन्धान अघि बढाइएको छ ।
शव अर्धनग्न अवस्थामा भेटिए पनि शरीरमा बाहिरी चोटपटक नदेखिएका कारण मृत्युको यकिन कारण खुल्न सकेको छैन। पोस्टमार्टम (शव परीक्षण), फरेन्सिक जाँचको प्रतिवेदन र प्रहरीको विस्तृत अनुसन्धानपछि मात्रै मृत्युको कारण तथा घटनासँग जोडिएका अन्य तथ्य स्पष्ट हुने प्रहरीको भनाइ छ । 'महिलाको मृत्युको यो घटना रहस्यमय छ, हामी विभिन्न कोणबाट गहिरो अनुसन्धान गरिरहेका छौँ,' एसपी कटवालले भने।
