: संयुक्त अरब इमिरेट्स (यूएई) को फुजैराहमा भएको भीषण सडक दुर्घटनामा १४ जनाको मृत्यु भएको छ ।दुर्घटनामा थप ३० जना घाइते भएका छन्।
१८ वटा कार तथा अन्य सवारीसाधन र पाँचवटा ट्रक एक आपसमा ठोक्किएर दुर्घट्ना भएको थियो । यूएईको आन्तरिक मामिला मन्त्रालयका अनुसार बिहीबार मध्यराति फुजैराह प्रवेश गर्ने शेख खलिफा बिन जायद सडकमा दुर्घटना भएको हो।
दुर्घट्नामा एउटा ट्रकका चालकले नियन्त्रण गुमाएपछि अर्को सवारीसाधनमा ठक्कर दिएका थिए। ठक्करबाट उक्त सवारीसाधन पल्टिएको थियो। त्यसपछि सडकमा ट्राफिकका कारण रोकिएका अन्य सवारीसाधन समेत आगो फैलिएको थियो।
दुर्घटनालगत्तै प्रहरी, एम्बुलेन्स तथा सिभिल डिफेन्सका उद्धार टोली घटनास्थल पुगेका थिए। घाइतेलाई प्राथमिक उपचारपछि विभिन्न अस्पतालमा पुर्याइएको थियो।
घाइतेमध्ये १५ जना उपचारपछि अस्पतालबाट डिस्चार्ज भइसकेका छन्। बाँकी घाइतेको स्थानिय अस्पतालमा उपचार भइरहेको छ। घाइते हुनेमा यूएई, ओमान, भारत, ब्राजिल, पाकिस्तान, जोर्डन र इजिप्टका नागरिक रहेको जनाईएको छ। मृतकहरुको पहिचानको बारेमा भने मन्त्रालयले थप खुलाउन बाँकी छ ।
फुजैराह प्रहरीले दुर्घटनाको कारण र परिस्थितिबारे अनुसन्धान भइरहेको जनाएको छ। प्रहरीले सवारी चालकलाई ट्राफिक नियम पालना गर्न, तोकिएको गतिसीमा कायम राख्न र अगाडिको सवारीसाधनसँग पर्याप्त दूरी कायम गर्न आग्रह गरेको छ। आन्तरिक मामिला मन्त्रालयले मृतकका परिवारप्रति गहिरो समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ।
