। नेपाली कांग्रेसको देउवा समूहले १५औं महाधिवेशनअन्तर्गत गण्डकी प्रदेशको अधिवेशन आगामी मंसिर ५ र ६ गते पोखरामा गर्ने भएको छ ।
अधिवेशन आयोजक समितिले बिहीबार पत्रकार सम्मेलन गरेर पोखराको न्युरोडस्थित पोखरा सभागृहमा सुरु हुने प्रदेश अधिवेशनको उद्घाटन पूर्वसभापति शेरबहादुर देउवाले गर्ने जनाएको छ ।
मंसिर ६ गते बन्दसत्र तथा निर्वाचन प्रक्रिया पोखरा महानगरपालिका–९, बाँस्तोलाथरस्थित सिल्भर पार्टी प्यालेसमा सञ्चालन हुनेछ ।
अधिवेशनमा एक हजार ६ सयभन्दा बढी प्रतिनिधि सहभागी हुने आयोजक समितिले जनाएको छ । ३६ प्रदेश निर्वाचन क्षेत्रबाट २१ जनाका दरले ७५६ प्रदेश प्रतिनिधि र १८ संघीय निर्वाचन क्षेत्रबाट ३५ जनाका दरले ६३० केन्द्रीय महाधिवेशन प्रतिनिधि सहभागी हुनेछन् ।
त्यस्तै, ३६ प्रदेशसभा निर्वाचन क्षेत्रका सभापति, १८ प्रतिनिधिसभा निर्वाचन क्षेत्रका सभापति, प्रदेशका ८५ वटै पालिकाका पार्टी सभापति र सभापतिबाट मनोनीत ४० प्रदेश प्रतिनिधिसहित विभिन्न भ्रातृ तथा शुभेच्छुक संस्थाका प्रतिनिधि, स्थानीय तहका निर्वाचित जनप्रतिनिधि तथा प्रदेश र संघीय सांसदहरूको सहभागिता रहनेछ ।
अधिवेशनबाट गण्डकी प्रदेश कार्यसमितिको नयाँ नेतृत्व चयन हुनेछ । गण्डकी प्रदेशका ११ जिल्लामध्ये हालसम्म पाँच जिल्लाको अधिवेशन सम्पन्न भइसकेको छ ।
कास्कीमा ऋषिराम काफ्ले, पर्वतमा यमबहादुर मल्ल (रामकृष्ण), स्याङ्जामा इन्द्र गोदार, म्याग्दीमा हिराबहादुर पुन र मनाङमा राजीव गुरुङ (दीपक मनाङे) को नेतृत्वमा जिल्ला कार्यसमिति निर्विरोध चयन भएका छन् ।
बाँकी जिल्लाको अधिवेशन पनि प्रदेश अधिवेशनअघि सम्पन्न गर्ने गरी कार्यतालिका सार्वजनिक गरिएको छ । जसअनुसार नवलपुरमा कात्तिक २८ गते, लमजुङमा मंसिर १ गते, तनहुँमा मंसिर २ गते तथा बागलुङ र गोरखामा मंसिर ३ गते जिल्ला अधिवेशन गर्ने तयारी छ । मुस्ताङमा पनि छिट्टै अधिवेशन सम्पन्न गर्ने गृहकार्य भइरहेको आयोजक समितिले जनाएको छ ।
प्रदेश अधिवेशनका लागि आवश्यक व्यवस्थापकीय तयारी करिब पूरा भएको समितिले जनाएको छ । प्रदेश उपसभापति मेखलाल श्रेष्ठको संयोजकत्वमा मूल आयोजक समिति गठन गरिएको छ ।
त्यस्तै, प्रचारप्रसार, अर्थ व्यवस्थापन, भोजन व्यवस्थापन, अतिथि स्वागत तथा सांस्कृतिक र मञ्च व्यवस्थापनलगायतका उपसमिति गठन गरी तयारी अघि बढाइएको छ ।
अधिवेशनको निर्वाचन प्रक्रिया सम्पन्न गर्न नेपाल बार एसोसिएसनका पूर्वकेन्द्रीय उपाध्यक्ष एवं अधिवक्ता वीरेन्द्र केसीको संयोजकत्वमा प्रदेश निर्वाचन समिति गठन गरिएको छ ।
