: रुसी राष्ट्रपति भ्लादिमिर पुटिनले युक्रेनसँग शान्ति कायम गर्न युरोपको सुरक्षा संरचनामै परिवर्तन हुनुपर्ने माग अघि सारेका छन् ।
अमेरिकी प्रतिनिधि स्टिभ विट्कफ र जेरेड कुशनरसँगको वार्तापछि क्रेमलिनले दीर्घकालीन शान्ति र अविभाज्य सुरक्षा संरचना आवश्यक रहेको जनाएको छ ।
रुसले युक्रेन र जर्जियालाई नेटोको सदस्य बन्न रोक्नुपर्ने तथा पूर्वी र मध्य युरोपमा नेटोको सैन्य संरचना घटाउनुपर्ने पुरानै माग फेरि अघि सारेको बिबिसिले जनाएको छ ।
पुटिनका विदेश नीति सल्लाहकार युरी उशाकोभले पश्चिमी देशहरूले रुसलाई रणनीतिक रूपमा पराजित गर्ने प्रयास गरेको भन्दै मागमा थप विषय समावेश हुन सक्ने संकेत गरेका छन् ।
युरोपेली संघकी विदेश मामिला प्रमुख काजा कलासले रुसको नयाँ सुरक्षा संरचनाको माग युद्धविरामको विषयबाट ध्यान मोड्ने प्रयास भएको टिप्पणी गरेकी छन् ।
यसैबीच, युक्रेन, रुस र अमेरिकाबीच अबुधाबीमा शान्तिवार्ता भएको छ । आगामी वार्तामा युरोपेली प्रतिनिधिहरूको सहभागिताबारे भने क्रेमलिनले अन्तिम निर्णय भइनसकेको जनाएको छ ।
