: माइक्रोसफ्टका सेवा २२ घण्टाभन्दा बढी समय अवरुद्ध भएपछि विश्वभरका अत्यावश्यक सेवा र संस्थाहरू प्रविधिमा कति निर्भर छन् भन्ने विषयमा बहस सुरु भएको छ ।
माइक्रोसफ्ट ३६५ अन्तर्गतका आउटलुकलगायतका सेवा प्रभावित हुँदा विश्वका विभिन्न देशका व्यवसाय, सरकारी निकाय तथा सार्वजनिक संस्थाहरूले समस्या भोग्नुपरेको थियो ।
माइक्रोसफ्टका अनुसार नियमित स्वचालित जाँचका क्रममा केही सर्भर बन्द हुँदा बाँकी सर्भरमा अत्यधिक ट्राफिकको चाप परेको थियो । त्यसकै कारण सेवा अवरुद्ध भएको कम्पनीले जनाएको छ । प्राविधिक टोलीले क्रमशः सेवा पुनःस्थापना गरेपछि समस्या समाधान हुन झन्डै एक दिन लागेको थियो ।
साना व्यवसायको प्रतिनिधित्व गर्ने स्मल बिजनेस चार्टरकी कार्यकारी निर्देशक फ्लोरा ह्यामिल्टनले यो घटनाले व्यवसायहरू डिजिटल प्रणालीमा कति निर्भर छन् भन्ने स्पष्ट पारेको बताएकी छन् ।
उनका अनुसार विशेषगरी साना तथा मझौला व्यवसायका लागि ग्राहक र आपूर्तिकर्तासँग सम्पर्क गर्न, कारोबार सञ्चालन गर्न तथा आम्दानी गर्न इमेल सेवा अत्यन्त महत्त्वपूर्ण हुन्छ ।
विश्वभर करिब ४३ करोड मानिसले माइक्रोसफ्ट ३६५ प्रयोग गर्दै आएका छन् । ७० भन्दा बढी देशमा यसका सेवामा समस्या देखिएको थियो। यसको प्रभाव अमेरिकी प्रतिनिधिसभाको इमेल प्रणाली, अस्ट्रेलियाका गुप्तचर निकाय, सिंगापुरका अदालतका प्रणाली तथा भारतका विमान सेवा सहयोग केन्द्रसम्म परेको थियो ।
माइक्रोसफ्टले उक्त समस्या साइबर आक्रमणका कारण नभई प्राविधिक त्रुटिका कारण भएको स्पष्ट पार्दै माफी मागेको बिबिसिले जनाएको छ । कम्पनीले सेवाको माग अत्यधिक भएकाले क्रमिक रूपमा सेवा पुनःस्थापना गरिएको जनाएको छ ।
प्रविधि रणनीतिकार वाल्टर पास्क्वारेलीले यस घटनाले सरकार, व्यवसाय र अत्यावश्यक पूर्वाधारहरू प्रविधिमाथि कति निर्भर छन् भन्ने देखाएको बताएका छन् । उनका अनुसार भविष्यमा कृत्रिम बुद्धिमत्ता (एआई) प्रणालीलाई इमेल, क्यालेन्डर र फाइलसँग जोड्दै जाँदा यस्ता अवरोधको प्रभाव अझ व्यापक हुन सक्छ ।
पूर्व सफ्टवेयर इन्जिनियर गेर्गेली ओरोस्जले यस्ता प्राविधिक अवरोध नयाँ नभए पनि सेवा पुनःस्थापना गर्न लागेको लामो समय असामान्य भएको टिप्पणी गरेका छन् ।
उनले केही ठूला अमेरिकी प्रविधि कम्पनीमाथिको विश्वव्यापी निर्भरता कम गर्न क्षेत्रअनुसार सेवा प्रणाली विभाजन गर्नुपर्ने सुझाव दिएका छन् ।
माइक्रोसफ्टले घटनाबारे आन्तरिक समीक्षा गरिरहेको र भविष्यमा यस्ता समस्या दोहोरिन नदिन आवश्यक सुधारका कदम चाल्ने जनाएको छ ।
