: अमेरिकाको हवाई ट्राफिक नियन्त्रण प्रणालीमा सञ्चारसम्बन्धी समस्या देखिएपछि देशभरका सबै हवाई उडान रोकिएका छन् ।
अमेरिकी संघीय उड्डयन प्रशासन (एफएए) ले शुक्रबार असाधारण परिस्थिति र यात्रुको सुरक्षालाई ध्यानमा राख्दै अर्को सूचना जारी नभएसम्मका लागि सबै उडान रोक्ने आदेश दिएको हो ।
एफएएका अनुसार देशभर उडान सञ्चालन गर्ने विमानहरूको निगरानी तथा व्यवस्थापन गर्ने एयर रुट ट्राफिक कन्ट्रोल सेन्टरहरूमा सञ्चार समस्या देखिएको छ । पछिल्लो जानकारीअनुसार उडान रोक्नुको कारण अस्थायी दूरसञ्चार अवरोध रहेको प्रशासनले जनाएको छ ।
अमेरिकी यातायातमन्त्री सिन डफीले प्राविधिक टोली समस्या समाधानका लागि परिचालित भएको बताएका छन्। यता, गृह सुरक्षा मन्त्री मार्कवेन मुलिनले समस्या समाधानका लागि निश्चित समयसीमा तय नभएको बताएका छन् । उनका अनुसार एक घण्टाभित्रै समस्या समाधान हुने अवस्था छैन ।
अमेरिकी अधिकारीहरूले उक्त घटनामा राष्ट्रिय सुरक्षामाथि कुनै खतरा नरहेको र प्रारम्भिक जानकारीअनुसार साइबर आक्रमण पनि नभएको बताएका छन् । राष्ट्रपति डोनाल्ड ट्रम्पलाई घटनाबारे जानकारी गराइएको छ ।
एफएएका अनुसार आकाशमा उडिरहेका सबै विमानको अवस्थाबारे जानकारी लिइएको छ । अन्तर्राष्ट्रिय उडानलाई भने परिस्थितिअनुसार छुट्टाछुट्टै निर्णय गरेर व्यवस्थापन गरिनेछ ।
अमेरिकाको प्रमुख विमान सेवा कम्पनी अमेरिकन एयरलाइन्सले उडान रोक्ने आदेश कायम रहेसम्म दिनभर नै उडान प्रभावित हुन सक्ने जनाएको छ । उडान रोक्ने आदेश हटेपछि यात्रुलाई गन्तव्यसम्म पुर्याउन सबै स्रोत परिचालन गर्ने कम्पनीको भनाइ छ। यसअघि नै आकाशमा रहेका विमानले भने आफ्नो गन्तव्यसम्मको यात्रा जारी राख्न सक्नेछन् ।
अमेरिकामा यसअघि सन् २०२३ जनवरीमा विमान चालकलाई आवश्यक सूचना दिने प्रणालीमा समस्या आएपछि देशव्यापी रूपमा उडान रोकिएको थियो । त्यसअघि सन् २००१ सेप्टेम्बर ११ को आतंकवादी आक्रमणपछि अमेरिकाभरका उडान रोकिएका थिए ।
