: नेपाली कांग्रेस (देउवा पक्ष) का नेता एवं पूर्वमन्त्री डा. प्रकाशशरण महतले गगन थापाकै कारण गत चुनावमा कांग्रेसको सिट संख्या खुम्चिएको बताएका छन्।
शनिबार नुवाकोट क्षेत्र नम्बर १ को क्षेत्रीय अधिवेशनको उद्घाटन गर्दै महतले पार्टीको मर्म र भावना नबुझ्नेहरूका कारण चुनावमा कांग्रेस कमजोर भएको उल्लेख गरे। कांग्रेसको विशेष महाधिवेशनबाट आएका सभापति थापाप्रति लक्षित गर्दै उनले प्रतिनिधि सभामा सिट सीमित हुन पुग्नु दुर्भाग्यपूर्ण रहेको बताए। ‘शेरबहादुर देउवाको नेतृत्वमा चुनावमा गएको भए पार्टीले सजिलै ५५ सिट हासिल गर्ने थियो,’ उनले भने।
डा. महतले नियमित महाधिवेशनपछि कांग्रेसमा सबै पक्ष एकताबद्ध हुने दाबीसमेत गरे। कांग्रेसलाई विभिन्न पक्षबाट आक्रमण तथा षड्यन्त्र भइरहेको उल्लेख गर्दै महतले पार्टीलाई व्यक्तिवादी नभई सिद्धान्तनिष्ठ, विधिसम्मत र संस्थागत संस्कारअनुसार चल्ने बनाउनुपर्नेमा जोड दिए।
विशेष महाधिवेशन पक्षधरले पार्टीमा विचार, विधान र संस्कारलाई प्राथमिकता नदिएको आरोप लगाउँदै नियमित महाधिवेशनबाट यी सबै कुराको अन्त्य हुनेसमेत उनले बताए।
