मुख्य समाचार
भोटेकोशीमा आएको बाढीपछि रसुवागढी नाका अवरुद्ध छ भने चीनले तातोपानी नाकाबाट हुने नियमित व्यापारिक आवागमनमा समेत रोक
भोटेकोशीमा आएको बाढीपछि रसुवागढी नाका अवरुद्ध छ भने चीनले तातोपानी नाकाबाट हुने नियमित व्यापारिक आवागमनमा समेत रोक

। नेपाल–चीनबीचको प्रमुख व्यापारिक नाका तातोपानी अहिले बन्द छ । भोटेकोशीमा आएको बाढीपछि रसुवागढी नाका अवरुद्ध छ भने चीनले तातोपानी नाकाबाट हुने नियमित व्यापारिक आवागमनमा समेत रोक लगाएको छ ।

परिणामत: नेपाल–चीन व्यापारको चाप अहिले मुस्ताङको कोरला नाकामा परेको छ । लामो दूरीबाट सामान ढुवानी गर्नुपर्दा लागत बढेको छ । बजारमा मूल्यवृद्धिको दबाब परेको छ भने तातोपानी क्षेत्रका व्यवसायी र स्थानीयको रोजीरोटी समेत गुम्दै गएको छ ।

अरनिको राजमार्गमा पहिरो र बाढीको जोखिम देखाउँदै चीनले २०८३ भदौ १४ गतेदेखि तातोपानी नाका व्यापारिक प्रयोजनका लागि बन्द गरेको छ । दशैँलाई लक्षित गरी तीन दिन खुलाइए पनि त्यसपछि पुन: बन्द हुँदा सीमावर्ती क्षेत्रको व्यापार व्यवसाय ठप्पजस्तै बनेको छ । होटल, पसल, यातायात र मजदुरीमा निर्भर स्थानीयको रोजीरोटी संकटमा परेको छ ।

भोटेकोशी बाढीले रसुवागढी नाका पनि अवरुद्ध भएपछि नेपाल–चीन व्यापार थप प्रभावित बनेको छ । तातोपानी र रसुवागढी दुवै नाका बन्द भएपछि व्यवसायीहरू सामान आयातका लागि मुस्ताङस्थित कोरला नाकातर्फ केन्द्रित हुन थालेका छन् । तर कोरला हुँदै सामान ल्याउँदा ढुवानी खर्च अस्वाभाविक रूपमा बढेको छ ।


तातोपानी र रसुवागढी हुँदै प्रतिकन्टेनर करिब ६० हजार रुपैयाँमा काठमाडौं आइपुग्ने सामान कोरला नाका प्रयोग गर्दा ६ लाख रुपैयाँसम्म खर्च लाग्ने गरेको व्यवसायी बसन्त नेपालको भनाई छ ।

कोरला नाका प्रयोग गर्दा ल्हासाबाट करिब ९ सय किलोमिटर र लोमान्थाङबाट साढे चार सय किलोमिटर दूरी पार गर्नुपर्ने भएकाले ढुवानी लागत बढेको हो । यसको प्रत्यक्ष असर आयातित वस्तुको मूल्यमा परेको छ । व्यवसायीको लागत बढेसँगै उपभोक्तासमेत महँगो मूल्य तिर्न बाध्य भएको व्यवसायी नानीराम तिवारीको अनुभव छ ।

व्यवसायीले तातोपानी नाका तत्काल सञ्चालनमा ल्याउन सरकारसँग कूटनीतिक पहल तीव्र बनाउन माग गरेका छन् । उनीहरूका अनुसार नाका खुलाउने विषयमा संघीय सरकारको उच्चस्तरीय सक्रियता पर्याप्त देखिएको छैन । यद्यपि नाका सञ्चालनका विषयमा चीनसँग राजनीतिक तहमा संवाद भइरहेको छ ।

सिन्धुपाल्चोकका निवर्तमान प्रतिनिधिसभा सदस्य माधव सापकोटा र तत्कालीन प्रधानमन्त्री पुष्पकमल दाहाल ‘प्रचण्ड’ का परराष्ट्र सल्लाहकार एवं परराष्ट्रविद् डा. रूपक सापकोटाले चिनियाँ राजनीतिक नेतृत्वसँग भेटवार्ता गरी नाका पूर्ण रूपमा सञ्चालन गर्न आग्रह गरेका छन् । चिनियाँ पक्षले पनि यस विषयलाई गम्भीरतापूर्वक लिएको र सकारात्मक धारणा व्यक्त गरेको निवर्तमान प्रतिनिधिसभा सदस्य माधव सापकोटाको भनाइ छ ।

तर, नाका सञ्चालनको विषय व्यापारिक मागमा मात्रै सीमित छैन । भोटेकोशी बाढी, सम्भावित हिमताल विस्फोट र नाका नजिकैको पहिरोका कारण चीनले सीमा क्षेत्रको सुरक्षालाई प्राथमिकतामा राखेको छ ।

नेपाल–चीन व्यापार सहज बनाउन कूटनीतिक संवादसँगै सुरक्षित सडक, भरपर्दो पूर्वसूचना प्रणाली र जोखिम न्यूनीकरणका पूर्वाधार निर्माणमा सरकारले ध्यान दिनुपर्ने सरोकारवालाको भनाइ छ ।

प्रतिक्रिया दिनुहोस्
अन्य समाचारहरु
। ४५६ मेगावाटको आयोजना सञ्चालन गरिरहेको माथिल्लो तामाकोशी जलविद्युत् कम्पनीले तीन महिनामै करिब ४ अर्बको बिजुली बिक्री गरेको छ। कम्पनीले सार्वजनिक गरेको चालु आर्थिक वर्षको पहिलो त्रैमासिक वित्तीय विवरणअनुसार कम्पनीको बिक्री आम्दानी ३ अर्ब ९४ करोड रुपैयाँ छ । गत वर्ष यसै अवधिमा कम्पनीको बिक्री आम्दानी ३ अर्ब ८५ करोड रुपैयाँ थियो । कम्पनीको आम्दानी बढे पनि ...
— दोधारा चाँदनी झोलुंगे पुल भत्किएर आवामन रोकिएपछि पुल वारिपारितर्फका होटल व्यवसाय धरासायी बनेका छन् । गत असोज दोस्रो साता महाकाली नदीमा आएको बाढीले दोधारा चाँदनी र भीमदत्त नगरपालिका जोड्ने उक्त पुल धरासायी भएपछि सो क्षेत्रमा आन्तरिक तथा बाह्य पर्यटक अवलोकनका लागि आउने क्रम घट्दै गएको छ । 'पुलको एउटा पिल्लर भत्किएपछि हाम्रो त मुखमै ...
— मुलुकको प्रमुख व्यापारिक नाका वीरगन्जबाट खाद्यान्न आयातमा गिरावट आएको छ। चालु आर्थिक वर्ष २०८३/८४ को पहिलो तीन महिना (साउन–असोज) मा यो नाका हुँदै आयात हुने चामल, मकै, धान, माल्ट तथा अन्य खाद्यान्नको परिमाण घटेको छ। अघिल्लो वर्षको सोही अवधिमा गहुँ आयात नभएकोमा यस वर्ष भने उल्लेख्य परिमाणमा गहुँ भित्रिएको छ। वीरगन्ज भन्सार कार्यालयको तथ्यांकअनुसार, चालु ...
: अर्थ समितिका सभापति डा. कृष्णहरि बुढाथोकीले स्वास्थ्य क्षेत्रको सुधारका लागि अन्तर्राष्ट्रिय सहयोग महत्त्वपूर्ण रहेको बताएका छन्। इन्डोनेसियाको बालीमा आयोजित एसियाली संसदीय स्वास्थ्य तथा अर्थ समिति सभापतिहरूको बैठकमा नेपालको तर्फबाट प्रतिनिधित्व गर्दै बुढाथोकीले नेपालको स्वास्थ्य प्रणालीका चुनौती, सुधारका सम्भावना र आवश्यक नीतिगत प्राथमिकताबारे धारणा राखेका थिए। उनले नेपालको तर्फबाट स्वास्थ्य क्षेत्रको दिगो वित्तपोषण, नीतिगत सुधार, सुशासन, ...
: अर्थमन्त्री डा. स्वर्णिम वाग्लेले भोटेकोशी बाढीप्रभावित क्षेत्रमा राहत, पुनर्निर्माण र पुनरुत्थानका लागि बजेटको अभाव हुन नदिने बताएका छन्। शुक्रबार बसेको प्रतिनिधि सभाअन्तर्गतको हिमालमा जलवायु परिवर्तनको प्रभाव, जलवायु न्याय तथा भोटेकोशी-त्रिशूली विपद्सम्बन्धी संसदीय विशेष समितिको बैठकमा मन्त्री वाग्लेले भोटेकोशी बाढीबाट २ दशमलव ७ देखि २ दशमलव ८ बिलियन डलरको क्षति देखिएको जानकारी दिए। पुनर्निर्माणका लागि करिब ...