: अमेरिकाको म्यासाचुसेट्स राज्यमा आफ्नै तीन सन्तानको हत्या गरेको आरोप लागेकी लिन्डसे क्लेन्सीविरुद्ध आगामी वर्ष पुनः मुद्दा चलाइने भएको छ ।
अदालतले सोमबार सुनुवाइ गर्दै सन् २०२७ मार्च २९ का लागि पुनः सुनुवाइको मिति तोकेको हो । यसअघि भएको सुनुवाइमा १२ सदस्यीय जुरीबीच एकमत हुन नसकेपछि अदालतले मुद्दामा सुनुवाइ निष्कर्षविहीन भएको घोषणा गरेको थियो ।
३६ वर्षीया क्लेन्सीमाथि सन् २०२३ जनवरी २४ मा आफ्नै घरमा पाँच वर्षीया छोरी कोरा, तीन वर्षीय छोरा डसन र आठ महिनाका छोरा क्यालनको घाँटी कसेर हत्या गरेको आरोप छ । अभियोजन पक्षले यसअघि उनीविरुद्ध योजनाबद्ध हत्यासम्बन्धी तीनवटा अभियोग लगाएको थियो ।
तर, प्रतिरक्षा पक्षले क्लेन्सी गम्भीर प्रसवोत्तर मानसिक विकार (पोस्टपार्टम साइकोसिस) बाट पीडित रहेको दाबी गर्दै उनी आपराधिक रूपमा जिम्मेवार नरहेको जिकिर गर्दै आएको छ ।
गत सेप्टेम्बर ४ मा भएको पहिलो सुनुवाइमा जुरी सदस्यहरूबिच सहमति जुट्न नसकेपछि न्यायाधीश विलियम सुलिभानले मुद्दामा पुनः सुनुवाइ गर्नुपर्ने अवस्था आएको बताएका थिए । केही जुरी सदस्यले सञ्चारमाध्यमसँगको कुराकानीमा क्लेन्सीलाई मानसिक अस्वस्थताका कारण दोषमुक्त गर्न आफूहरू तयार रहेको तर एक सदस्य सहमत नभएको बताएका थिए ।
यसैबिच, प्रतिरक्षा पक्षले एउटै कसुरमा पटक–पटक मुद्दा चलाउन नपाइने कानुनी सिद्धान्त (डबल जियोपार्डी) को आधारमा मुद्दा खारेज गर्न गरेको माग एक साताअघि न्यायाधीशले अस्वीकार गरेका थिए । त्यससँगै उनीविरुद्ध पुनः मुद्दा चलाउने बाटो खुलेको हो ।
क्लेन्सीले आफ्ना सन्तानमाथि व्यायामका लागि प्रयोग हुने इलास्टिक ब्यान्ड प्रयोग गरी घाँटी कसेको अभियोजन पक्षको आरोप छ । घटनाअघि उनले आफ्ना तत्कालीन श्रीमान् प्याट्रिक क्लेन्सीलाई खानेकुरा र बालबालिकाका लागि औषधि लिन घरबाहिर पठाएको बताइएको छ ।
अभियोजन पक्षले यसपटक पनि उनीविरुद्ध प्रथम श्रेणीको हत्याको अभियोग अघि बढाउने संकेत गरेको भए पनि त्यसबारे औपचारिक निर्णय सार्वजनिक गरिसकेको छैन । दोस्रो श्रेणीको हत्यासम्बन्धी कम गम्भीर अभियोग लगाउने विकल्पसमेत अभियोजन पक्षसँग रहेको छ ।
हाल क्लेन्सी म्यासाचुसेट्सस्थित सरकारी मनोचिकित्सकीय अस्पताल तथा उपचार केन्द्रमा रहेकी छन् । यस घटनाले अमेरिकामा प्रसवोत्तर मानसिक स्वास्थ्य समस्या र त्यसको कानुनी जिम्मेवारीबारे व्यापक बहससमेत सिर्जना गरेको छ ।