: अमेरिकी राष्ट्रपति डोनाल्ड ट्रम्पले एनभिडियाका पूर्व प्रमुख कार्यकारी अधिकृत (सीईओ) जेन्सेन हुआङलाई पुनः कम्पनीको नेतृत्वमा फर्काइएको देख्न आफूलाई कुनै आपत्ति नहुने बताएका छन् ।
हुआङले गत साता व्यक्तिगत सम्बन्धसम्बन्धी विवाद सार्वजनिक भएपछि एनभिडियाको प्रमुख पदबाट राजीनामा दिएका थिए । उनीमाथि चीनका लागि जासुसी गरेको आशंका गरिएकी एक महिलासँग र आफ्नै कम्पनीकी एक कर्मचारीसँग सम्बन्ध रहेको आरोप सार्वजनिक भएको थियो ।
विश्वकै मूल्यवान प्रविधि कम्पनीमध्ये एक एनभिडियाको नेतृत्व परिवर्तनले कृत्रिम बौद्धिकता (एआई) उद्योगमा समेत चर्चा सिर्जना गरेको छ । यसैबिच हुआङलाई पुनः नेतृत्वमा फर्काउन कम्पनीका सञ्चालक समितिमाथि दबाब बढ्न थालेको बिबिसिमा उललेख छ ।
स्पेसएक्सका प्रमुख एलन मस्क र फोर्टनाइट निर्माता कम्पनी एपिक गेम्सका प्रमुख टिम स्वीनीसहित प्रविधि क्षेत्रका व्यक्तिहरूले ‘ब्रिङ जेन्सेन ब्याक’ अभियानलाई समर्थन गरेका छन् । हुआङलाई पुनर्बहाली गर्न माग गर्दै सुरु गरिएको खुला पत्रमा एक लाख ७५ हजारभन्दा बढीले हस्ताक्षर गरेका छन् ।
सोमबार ह्वाइट हाउसबाट बाहिरिने क्रममा पत्रकारहरूसँग कुरा गर्दै राष्ट्रपति ट्रम्पले हुआङ पुनः एनभिडियाको नेतृत्वमा फर्किए आफूलाई कुनै आपत्ति नहुने बताएका हुन् । उनले हुआङको भविष्यबारे सोधिएको प्रश्नमा आफूले त्यस्तो निर्णयलाई नराम्रो नमान्ने प्रतिक्रिया दिएका थिए ।
यसअघि ‘स्ट्यान्ड विथ जेन्सेन’ अभियानमा संलग्न समूहले हुआङलाई पर्याप्त प्रक्रियागत सुनुवाइबिना पदबाट हटाइएको भन्दै कम्पनीको सञ्चालक समितिसमक्ष पुनर्बहालीको माग गरेको थियो । उक्त समूहले आफूहरू वर्तमान तथा पूर्व कर्मचारी, साझेदार, सेयरधनी र समर्थक रहेको दाबी गरेको छ ।
फाइनान्सियल टाइम्सका अनुसार हुआङले आफ्नो पुनरागमनको सम्भावनाबारे निकटस्थहरूसँग छलफल गरिरहेका छन् । यद्यपि एनभिडियाभित्र जारी आन्तरिक अनुसन्धानका कारण तत्काल उनको पुनर्बहाली हुने सम्भावना न्यून रहेको बीबीसीले जनाएको छ ।
यस प्रकरणले अमेरिकी सरकारी निकायहरूबिच समेत तनाव सिर्जना गरेको छ । अमेरिकी अर्थमन्त्री स्कट बेसेन्टले एनभिडियाले अब कम्पनीबाहिरबाट नयाँ प्रमुख कार्यकारी नियुक्त गर्नुपर्ने धारणा राखेका छन् । अर्कोतर्फ ट्रम्पले हुआङप्रति सकारात्मक धारणा व्यक्त गर्दै उनीमाथि विश्वास रहेको बताएका छन् ।
विवादसँगै एनभिडियाका उच्च क्षमताका चिप चीनसम्म पुगेको हुन सक्ने आशंका पनि उठेको छ । अमेरिकाले सोमबार सिंगापुर, थाइल्यान्ड, मलेसिया, इन्डोनेसिया र ब्राजिलमा रहेका कम्पनीलाई उन्नत एआई चिप निर्यात गर्न विशेष अनुमति लिनुपर्ने नयाँ व्यवस्था अघि सारेको छ । निर्यात प्रतिबन्ध छल्दै चिप चीन पुग्न सक्ने सम्भावना रोक्नु यसको उद्देश्य रहेको बताइएको छ ।
हुआङले अमेरिकी कंग्रेसमा उपस्थित भएर राष्ट्रिय सुरक्षामा असर परेको वा नपरेको विषयमा बयान दिन सहमति जनाएका छन् । यस प्रकरणमा अमेरिकी संघीय अनुसन्धान ब्युरो (एफबीआई) ले समेत अनुसन्धान गरिरहेको ट्रम्पले बताएका छन् ।
यसैबिच एलन मस्कले हुआङको बहिर्गमनले एनभिडियासँग भएका केही महत्त्वपूर्ण प्रविधि तथा आपूर्ति सम्झौतामा असर पर्न सक्ने बताएका छन् । उनका अनुसार कम्पनीसँग भएका कतिपय महत्त्वपूर्ण सम्झौता लिखितभन्दा पनि हुआङसँगको व्यक्तिगत विश्वास र सहमतिमा आधारित थिए ।
हुआङको राजीनामापछि एनभिडियाको बजार मूल्यमा पनि ठूलो गिरावट आएको समाचारमा उल्लेख छ । यद्यपि कम्पनीको बजार मूल्य करिब ३.८७ ट्रिलियन अमेरिकी डलर रहेको छ । हाल कम्पनीकी प्रमुख वित्तीय अधिकृत कोलेट क्रेसले नेतृत्व सम्हालिरहेकी छन् । उनले मंगलबार कम्पनीको वित्तीय नतिजा सार्वजनिक गर्ने कार्यक्रम छ ।