: विराटनगर महानगरपालिका–४ इक्राहीस्थित उखुबारीमा शुक्रबार एक युवक मृत अवस्थामा फेला परेका छन्। करिब २५–२६ वर्ष उमेरका देखिने युवकको शव घोप्टो परेको अवस्थामा भेटिएको हो।
स्थानीयले उखुबारीमा युवकको शव देखेपछि प्रहरीलाई खबर गरेका थिए। प्रहरी घटनास्थल पुग्दा युवकको शरीरमा लगाएका कपडा यथावत् थिए। उनको दाहिने कानमा चोट लागेको र घाउबाट रगत बगिरहेको अवस्थामा शव फेला परेको प्रहरीले जनाएको छ। घटनाको प्रकृति शंकास्पद देखिएपछि मोरङ प्रहरी प्रमुख एसपी कवित कटवाल आफैं प्रहरी टोलीसहित घटनास्थल पुगेका छन्।
प्रहरीले घटनास्थलको निरीक्षण गर्दै आवश्यक प्रमाण संकलन गरिरहेको छ। युवकको मृत्यु कसरी भयो भन्नेबारे यकिन भइसकेको छैन। वन्यजन्तुको आक्रमणमा परेर मृत्यु भएको हो वा अन्यत्र हत्या गरी शव उखुबारीमा ल्याएर फालिएको हो भन्ने कोणबाट प्रहरीले अनुसन्धान गरिरहेको छ। प्रारम्भिक अवस्था हेर्दा हत्या गरेर शव फालिएको हुनसक्ने प्रहरीको आशंका छ।
एसपी कटवालले पोस्टमार्टम रिपोर्ट र अनुसन्धानबाट मात्रै घटनाको वास्तविकता खुल्ने बताए। मृतकको पहिचानसमेत खुल्न सकेको छैन। प्रहरीले घटनाको थप अनुसन्धान अघि बढाएको छ।