मुख्य समाचार
रुसले पुल आक्रमणको बदला लिँदै युक्रेनमाथि ४०० भन्दा बढी ड्रोन र ११० भन्दा बढी मिसाइल प्रहार
रुसले पुल आक्रमणको बदला लिँदै युक्रेनमाथि ४०० भन्दा बढी ड्रोन र ११० भन्दा बढी मिसाइल प्रहार

। रुसले क्रिमिया पुलमा युक्रेनले गरेको लगातारको आक्रमणको बदला लिएको छ। बिहीबार राति युक्रेनमाथि ४०० भन्दा बढी ड्रोन र ११० भन्दा बढी मिसाइल प्रहार गरिएको छ। यो आक्रमणमा ८ जनाको मृत्यु भएको छ।

युक्रेनका राष्ट्रपति भोलोदिमिर जेलेन्स्कीले रुसले आक्रमणमा २७ वटा ब्यालिस्टिक मिसाइलसमेत प्रयोग गरेको बताएका छन्।

उनले यसलाई युद्धकै सबैभन्दा ठूला आक्रमणमध्ये एक भनेका छन्। आक्रमणबाट कैयौँ पुल, बिजुली–पानीको आपूर्ति र रेलमार्गमा क्षति पुगेको छ।

यसअघि बिहीबार रुसी राष्ट्रपति भ्लादिमिर पुटिनले क्रिमिया पुलमा भएको आक्रमणप्रति असन्तुष्टि जनाएका थिए। उनले रुसले यस आक्रमणको पीडादायी जवाफ दिने चेतावनी दिएका थिए।


रातभरको आक्रमणबाट ज्यान जोगाउन मेट्रो स्टेसनमा लुके मानिस

युक्रेनका प्रधानमन्त्री सेर्गी कोरेत्स्कीका अनुसार आक्रमणमा मारिएका ८ जनामध्ये ६ जना राजधानी किभका थिए। बाँकी २ जनाको पश्चिमी सहर लभिभस्थित एक रेल्वे स्टेसनमा मृत्यु भयो।

रातभर भएको आक्रमणका क्रममा किभमा थुप्रै विस्फोट भए। ज्यान जोगाउन मानिसहरू मेट्रो स्टेसनहरूमा लुकेका थिए। रुसले निप्रो नदीमा बनेका किभका ३ वटा पुललाई पनि निसाना बनाएको छ। सरकारले सर्वसाधारणलाई कार लिएर काममा ननिस्कन अपिल गरेको छ।

रिपोर्टहरूका अनुसार फेब्रुअरी २०२२ मा युद्ध सुरु भएयता यी पुलहरूमा भएको यो हालसम्मकै ठूलो आक्रमण हो।

२०–३० मिनेटको अन्तर मिसाइल प्रहार

जेलेन्स्कीले रुसले सकेसम्म धेरै विनाश निम्त्याउने रणनीतिअनुसार आक्रमण गरेको आरोप लगाएका छन्। उनका अनुसार रुसी सेनाले क्लस्टर वारहेड भएका मिसाइलसमेत प्रयोग गर्‍यो। यस्ता मिसाइलमा एउटा ठूलो बमबाट कैयौँ साना बम निस्कन्छन्, जसले ठूलो क्षेत्रमा क्षति पुर्‍याउन सक्छन्।

जेलेन्स्कीका अनुसार रुसले सबै मिसाइल एकैपटक प्रहार नगरी विभिन्न समूहमा छोडेको थियो। प्रत्येक आक्रमणबीच २० देखि ३० मिनेटको अन्तर राखिएको थियो। यसले गर्दा आगलागी निभाउने, भग्नावशेष हटाउने र बिजुली–पानीजस्ता अत्यावश्यक सेवा सुचारु गर्ने काममा खटिएका उद्धार तथा राहत टोलीलाई काम गर्न कठिनाइ भयो।

उनले पुटिनले यो आक्रमण निकै सोचविचार गरेर र शक्ति प्रदर्शनका रूपमा गरेको बताए। जेलेन्स्कीले चीनमा भएका बैठकहरूलाई कमजोर बताउँदै विश्व व्यवस्थालाई आफ्नै हिसाबले बदल्ने रुसको प्रयास असफल भएको दाबी गरे।

युक्रेनले यो साता तेस्रोपटक क्रिमिया पुललाई निसाना बनाएको थियो

रुसको यो आक्रमण क्रिमिया पुलमा युक्रेनले गरेको हमलापछि भएको हो। यो पुलले क्रिमियालाई रुसको क्रास्नोदार क्षेत्रसँग जोड्छ। यो साता युक्रेनले तेस्रोपटक यसलाई निसाना बनाएको थियो।

यो पुल सडक र रेलमार्ग दुवैका लागि प्रयोग हुन्छ। युरोपको सबैभन्दा लामो यो पुल पुटिनका लागि निकै महत्त्वपूर्ण मानिन्छ। युक्रेनले पछिल्ला कैयौँ महिनादेखि रुसको सैन्य आपूर्ति र सामग्री ओसारपसार गर्ने मार्गहरूलाई निसाना बनाउँदै आएको छ।

जेलेन्स्कीले युक्रेनका पुल र अन्य पूर्वाधारमा रुसले गरेको आक्रमणको जवाफमा क्रिमिया पुललाई निसाना बनाइएको बताएका छन्।

पुटिनको बैठकअघि आक्रमणको समय मिलाइएको थियो

द गार्जियनका अनुसार युक्रेनका सैन्य स्रोतहरूले चीनमा ट्रम्प र जिनपिङसँगको बैठकअघि पुटिनलाई अन्तर्राष्ट्रिय मञ्चमा असहज बनाउन पुलमाथिको आक्रमणको समय जानाजानी त्यसरी मिलाइएको बताएका छन्।

युक्रेनका एक सैन्य अधिकारीले भने, ‘यो पुल पुटिनको शासनको प्रतीक हो। यसलाई ध्वस्त पारेर बाँकी दुवै ठूला नेताहरूलाई पुटिन आफूले देखाएजति शक्तिशाली छैनन् भन्ने सन्देश दिइएको छ।‘

रुसले क्रिमिया कब्जा गरेपछि बनाएको थियो पुल

करिब ३.६ अर्ब डलरको लागतमा बनेको केर्च ब्रिज रुसले क्रिमियामा कब्जा जमाएपछि निर्माण गरेको थियो। यो पुलले रुसलाई क्रिमियासँग जोड्छ। युक्रेनले यसलाई रुसी कब्जाको प्रतीक मान्छ र यसअघि पनि यसको निर्माणलाई अवैध बताउँदै आएको छ।

युक्रेनी सेनाका अनुसार यो पुल रुसी सेनाका लागि अत्यन्त महत्त्वपूर्ण छ। यही मार्ग हुँदै दक्षिणी क्षेत्रमा तैनाथ रुसी सैनिकहरूसम्म इन्धन, गोलाबारुद र सैन्य उपकरण पुर्‍याइन्छ। यद्यपि, पुटिनले भने यो पुल सर्वसाधारणले मात्र प्रयोग गर्ने दाबी गर्दै आएका छन्।

युक्रेनले यसअघि पनि दुईपटक यो पुल उडाउने प्रयास गरिसकेको छ। सन् २०२२ मा ट्रकमा बम राखेर आक्रमण गरिएको थियो भने सन् २०२३ मा सामुद्रिक ड्रोनमार्फत यसलाई निसाना बनाइएको थियो।

(एजेन्सीहरूको सहयोगमा)

प्रतिक्रिया दिनुहोस्
अन्य समाचारहरु
रुसले युक्रेनको राजधानी किभमा पुल र रेलवे स्टेसनलाई निशाना बनाउँदै रातभर ठूलो स्तरमा आक्रमण गरेको छ । आक्रमणमा ब्यालिस्टिक क्षेप्यास्त्रसमेत प्रयोग गरिएको थियो । युक्रेनी राष्ट्रपति भोलोदिमिर जेलेन्स्कीले यसलाई युद्ध सुरु भएयताकै सबैभन्दा ठूलो आक्रमणमध्ये एक बताएका छन् । आक्रमणमा कम्तीमा ९ जनाको मृत्यु भएको छ । रुसी राष्ट्रपति भ्लादिमिर पुटिनले यसअघि क्राइमिया पुलमा भएको आक्रमणको बदला ...
इरानले अमेरिकालाई आफ्ना सर्त स्वीकार गर्न वा पुनः युद्धको सामना गर्न चेतावनी दिएको छ । इरानको इस्लामिक रिभोलुसनरी गार्ड कर्प्स (आईआरजीसी) का प्रवक्ता ब्रिगेडियर जनरल हुसेन मोहेबीले आफ्नो देश कुनै पनि सैन्य परिस्थितिको सामना गर्न पूर्ण रूपमा तयार रहेको बताएका छन् । बिहीबार सञ्चारमाध्यमसँग कुरा गर्दै उनले इरान युद्ध र शान्तिबीचको अनिश्चित अवस्था स्वीकार नगर्ने स्पष्ट ...
: अमेरिकी राष्ट्रपति डोनाल्ड ट्रम्पले एनभिडियाका पूर्व प्रमुख कार्यकारी अधिकृत (सीईओ) जेन्सन हुआङलाई पुनः जिम्मेवारीमा फर्कने अवसर दिनुपर्ने बताएका छन् । ट्रम्पले हुआङ प्रतिभाशाली व्यक्ति भएको उल्लेख गर्दै उनको व्यक्तिगत र व्यावसायिक जीवनलाई अलग-अलग रूपमा हेर्नुपर्ने बताएका हुन् । उनले हुआङलाई दोस्रो मौका दिनुपर्ने विषयमा चिनियाँ राष्ट्रपति सी जिनपिङसँग समेत कुराकानी गरेको र जिनपिङले पनि त्यसमा ...
रुसी उपविदेशमन्त्री सर्गेई र्‍याबकोभले युक्रेनलाई नेटो सदस्यता दिने कुरा रुसका लागि स्वीकार्य नहुने बताएका छन् । रुसले युक्रेनको सुरक्षा प्रत्याभूतिसम्बन्धी विषयमा छलफल गर्नुअघि नेटो (उत्तर एटलान्टिक सन्धि सङ्गठन) को सदस्यता नलिने आफ्नो मागलाई युक्रेनले स्वीकार गर्नुपर्ने उनले धारणा राखे । सर्गेईले रुस संवादका लागि तयार रहेको उल्लेख गर्दै युक्रेनको नेटो सदस्यताको विषयमा भने कुनै सम्झौता हुन ...
साउदी नेतृत्वको गठबन्धनले यमनको राजधानी सानामा बिहीबार बिहानै हवाई आक्रमण गर्दै हुथी विद्रोहीका ब्यालिस्टिक क्षेप्यास्त्र र ड्रोन क्षमतासँग सम्बन्धित संरचनालाई निशाना बनाएको जनाएको छ । गठबन्धनका प्रवक्ता तुर्की अल–मल्कीले सामाजिक सञ्जाल एक्समार्फत आक्रमणमा हुथी विद्रोहीले क्षेप्यास्त्र प्रक्षेपण प्रणाली र ड्रोनका पार्टपुर्जा निर्माण तथा जडान गर्न प्रयोग गर्दै आएका ६ वटा कार्यशाला ध्वस्त पारिएको जानकारी दिएका छन् ...