: इरानको इस्लामिक रिभोलुसनरी गार्ड कर्प्स (IRGC) ले आफ्ना नौसेना कमाण्डर अलिरेजा ताङसिरीको मृत्यु भएको आधिकारिक पुष्टि गरेको छ। इजरायलले ताङसिरीलाई निशाना बनाएको दाबी गरेको चार दिनपछि इरानले उक्त घटनाको स्वीकारोक्ति गरेको बीबीसीमा उल्लेख छ ।


इस्लामिक रिभोलुसनरी गार्ड कर्प्स निकट मानिने तस्निम समाचार एजेन्सीद्वारा प्रकाशित विज्ञप्ति अनुसार, ताङसिरी टापु र तटीय क्षेत्रहरूको रक्षा कवचलाई सुदृढ पार्न र सैन्य बल परिचालन गर्न व्यस्त रहेका बेला घाइते भएका थिए। उपचारका क्रममा 'चोटको गम्भीरता' का कारण उनको मृत्यु भएको विज्ञप्तिमा उल्लेख छ।


इरानी सेनाले आफ्ना कमाण्डरको अनुपस्थितिमा पनि ' इस्लामिक रिभोलुसनरी गार्ड कर्प्स नेभी' ले हर्मोज जलडमरूमा आफ्नो निर्णायक नियन्त्रण कायम राखेको र शत्रुमाथि कडा प्रहार गरिरहेको दाबी गरेको छ। विज्ञप्तिमा भनिएको छ, 'शत्रु पूर्ण रूपमा विनाश नभएसम्म हामी शान्त रहने छैनौँ।'



को हुन् ताङसिरी?

ताङसिरी इस्लामिक रिभोलुसनरी गार्ड कर्प्सका सबैभन्दा वरिष्ठ कमाण्डरहरूमध्ये एक थिए। सामरिक रूपमा महत्वपूर्ण हर्मोज जलडमरूबाट हुने जहाजहरूको आवतजावतको निगरानी गर्ने मुख्य जिम्मेवारी उनकै थियो। उनले सामाजिक सञ्जाल 'एक्स' मार्फत इरानविरुद्ध आक्रामक हुने कुनै पनि जहाजलाई सो क्षेत्रबाट पार हुन नदिने चेतावनी दिँदै आएका थिए।

अमेरिका र इजरायलविरुद्ध कडा अभिव्यक्ति दिने नेताका रूपमा चिनिने ताङसिरीलाई सन् २०१९ मा अमेरिकाले प्रतिबन्ध लगाएको थियो। इरानले स्ट्रेट नजिकै अमेरिकी जासुसी ड्रोन खसालेपछि अमेरिकी अर्थ मन्त्रालयले उनलाई प्रतिबन्धित सूचीमा राखेको थियो।