: अमेरिकाको विस्कन्सिन राज्यमा 'पाइपर PA 46' (Piper PA 46) मोडलको साना फिक्स-विङ विमान दुर्घटना हुँदा एक बच्चासहित ६ जनाको मृत्यु भएको छ।
केनोसाबाट मेनोमोनीतर्फ गइरहेको उक्त विमान डेलोना क्षेत्रस्थित जंगलमा मंगलबार राति दुर्घटनामा परेको हो।
सोक काउन्टी शेरिफको कार्यालयका अनुसार राति करिब ९:३० बजे डेलोना शहरको पार्क लेन उत्तर र हर्विग रोड पश्चिम क्षेत्रमा विमान खसेको खबर प्राप्त भएको थियो। खबर पाएलगत्तै पुगेका उद्धारकर्ताहरूले खोजी तथा राहत कार्य सुरु गरेका थिए। तर, विमानमा सवार पाँच जना वयस्क र एक बच्चा गरी सबै ६ जनाको घटनास्थलमै मृत्यु भइसकेको प्रहरीले जनाएको छ।
नेसनल ट्रान्सपोर्टेसन सेफ्टी बोर्डका अनुसार विमान २४,००० फिटको उचाइमा उडिरहेका बेला पाइलटले पखेटा वा विमानमा बरफ जमेको जानकारी गराउँदै तल झर्न अनुरोध गरेका थिए।
एयर ट्राफिक कन्ट्रोलले तल झर्ने अनुमति दिएलगत्तै विमान अचानक दाहिनेतर्फ मोडिएको र त्यसपछि सञ्चार तथा डाटा ट्र्याकिङ सम्पर्क विच्छेद भएको थियो। बुधबार राति बसेको मेनोमोनी विमानस्थल आयोगको बैठकमा अध्यक्ष ड्यानियल जोन्सनले दुर्घटनामा ज्यान गुमाउने पाइलट रोन रिकभएको पुष्टि गरेका छन्।
बैठकको सुरुवातमा मृतकहरूप्रति सम्मान व्यक्त गर्दै जोन्सनले भने, 'मृतकहरूको सम्झनामा हामीले केही छिन मौनधारण गर्नुपर्छ।'
जोन्सनले आफूले रोन रिकलाई दशकौंदेखि चिनेको बताउँदै थपे, 'उहाँ एक असल व्यक्ति, अत्यधिक अनुभवी पाइलट र वुडभिलका एक सफल व्यवसायी हुनुहुन्थ्यो। उहाँको भण्डारण (वेयरहाउसिङ) व्यवसाय निकै सफल थियो।'
जोन्सनका अनुसार विमान सानो चट्याङसहितको आँधीमा फसेको र अध्याँरो भएपछि दुर्घटनाग्रस्त भएको अनुमान गरिएको छ। हाल अनुसन्धानकर्ताहरूले दुर्घटनाको वास्तविक कारणबारे थप अनुसन्धान गरिरहेका छन्।
