ओसाका, अक्टोबर ८ (न्यूज अन जापान) — जापानको प्रमुख बियर उत्पादक कम्पनी Asahi Group Holdings मा भएको ransomware साइबर आक्रमणका कारण बियरको आपूर्ति अवरुद्ध भएको छ, जसको प्रत्यक्ष असर देशभरका इज़ाकाया (स्थानीय बार) र रेष्टुरेन्टहरूमा देखिन थालेको छ।
कम्पनीले जनाएको अनुसार साइबर आक्रमणका कारण उत्पादन तथा वितरण प्रणाली पूर्ण रूपमा प्रभावित भएको छ, जसले गर्दा बियर आपूर्ति ढिलाइ भएको छ। केही बारहरूले त “अब केवल एउटा मात्र बियर बाँकी छ” भन्ने स्थिति आएको बताएका छन्।
यस घटनाले केवल असाही कम्पनी मात्र नभई, त्यसको बियरमा निर्भर रेष्टुरेन्ट, बार, र मदिरा वितरकहरूसमेत प्रभावित भएका छन्। जापानमा हालै यस्ता ransomware साइबर आक्रमणहरू तीव्र रूपमा बढेका छन्, जसले ठूला कम्पनीदेखि अस्पताल र सामान्य प्रयोगकर्तासम्मलाई निशाना बनाएका छन्।
एक जापानी समाचार संस्थाले हालै एक अस्पतालसँगको अन्तर्वार्तामा, पीडितहरूले उक्त साइबर आक्रमणलाई "प्राकृतिक प्रकोपजस्तै" महशुस भएको बताएका छन्। यसले अस्पताल सेवामा गम्भीर असर पारेको थियो।
साइबर सुरक्षा विशेषज्ञहरूका अनुसार यस्ता आक्रमणहरू दिनदिनै परिष्कृत हुँदै गइरहेका छन्, र अब मोबाइल फोनहरूमा समेत malicious एप्स र लिंकहरू मार्फत आक्रमण भइरहेको छ।
अहिले असाही कम्पनीले आफ्नो प्रणाली पुनः सञ्चालनमा ल्याउने प्रयास गरिरहेको छ, तर विशेषज्ञहरू भन्छन् कि यस्ता आक्रमणबाट पुनःस्थापना गर्न समय लाग्छ र प्रविधिक रूपमा निकै जटिल प्रक्रिया हो।
