होक्काइडो, अक्टोबर १० (न्युज अन जापान) — जापानभर भालुको आक्रमण तीव्र रुपमा बढिरहेको छ। चालु आर्थिक वर्ष २०२५ मा भालुका आक्रमणबाट ज्यान गुमाउनेको संख्या सन् २०२३ को रेकर्ड स्तरमा पुगेको छ।
जापानको वातावरण मन्त्रालयको प्रारम्भिक तथ्याङ्कअनुसार:
२०२३: २१९ पीडित, ६ जनाको मृत्यु
२०२४: ८५ पीडित, ३ जनाको मृत्यु
२०२५ (अक्टोबरसम्म): १०९ पीडित, ६ जनाको मृत्यु
यस वर्षको पहिलो छ महिनामै पीडितको संख्या अघिल्लो वर्षको तुलनामा बढी भइसकेको छ भने मृत्यु संख्या सन् २०२३ को रेकर्डसँग बराबरीमा पुगेको छ।
भालु स्वभावतः मानिसबाट डराउँछन्, तर अहिले ती शहरी क्षेत्रमा समेत देखिन थालेका छन्। HBC वाइल्डलाइफ साइट "कुमा कोको" की संवाददाता नाओ इकुशिमाका अनुसार, यो समस्या केवल भालुको संख्यामा वृद्धिका कारण मात्र होइन।
उनका अनुसार, “मानव समाजमा भएका परिवर्तनहरूमूल कारण हुन्। पहिला जंगल र बस्तीबीच खेत, बगैंचा र मानिसको उपस्थिति रहन्थ्यो। तर, जनसंख्या घटेपछि यी 'बफर जोन' हराएका छन्। फलस्वरूप, जंगलको छेउ बस्तीमा नै आइपुगेको छ।”
नदी किनार, खाली जमिन र झाडीले भरिएका खाली स्थानहरूले अब जंगललाई सिधै शहरसँग जोडिदिएका छन्। यसले भालुलाई अनायासै मानव बस्तीमा छिर्न सजिलो बनाएको छ।
इकुशिमाले थपिन्, “आजको युगमा हामी ‘हाम्रो क्षेत्रमा त भालु आउँदैन’ भनेर ढुक्क हुन सक्दैनौं।”
प्रहरी र स्थानिय निकायले भालुको गतिविधि बुझ्न जिपिएस कलर प्रयोग गरिरहेका छन्। यसै क्रममा टिभी प्रस्तोता ताकाहिरो इनोउएले स्थानीय तहले वैज्ञानिक रूपमा अनुसन्धान सुरु गरिरहेको बताए।
कमेन्टेटर दाइमाओ कोसाकाले भने, “पहिले मानिस र वन्यजन्तुबीच छुट्याउने ‘सातो’ भन्ने बफर जोन हुन्थ्यो। अहिले पनि अत्यधिक शिकार नगरी, तर मानव सुरक्षालाई प्राथमिकतामा राख्दै संयमित रूपमा व्यवस्थापन गर्नु जरुरी छ।”
इकुशिमाले जनाउँदै भनिन्, “धेरै मानिस भालुलाई नबुझेर डराउँछन्। यदि हामीले भालुको व्यवहार बुझ्यौं भने, तिनीहरूबाट कसरी जोगिने भन्ने ज्ञान पनि प्राप्त हुन्छ।”
उनी भालु समस्या समाधानको जड मानव समाजमै रहेको बताउँछिन्। उनका अनुसार, समाधान पनि स्थानीय परिस्थिति अनुसार भिन्न हुनुपर्छ:
फोहोरले आकर्षित गर्छ भने स्रोत हटाउनुहोस्।
खेतीपातीमा आउँछन् भने विद्युतीय तार लगाउनुहोस्।
हरियाली बाटोहरू बस्तीमा जोडिन्छन् भने घाँस काट्नुहोस्।
तर, स्थानीय बासिन्दाको रुचि पनि ध्यानमा राख्नुपर्छ — जस्तै, हरियाली संरक्षणसँगै विद्यालय जाने बाटो सुरक्षित बनाउने।
